Staður er gamalt prestssetur en var lagt niður með lögum árið 1885. Þó var það aftur prestssetur á árunum 1904-1920 þegar Eiríkur Gíslason, prófastur, var prestur í sókninni. Þar var Maríukirkja í kaþólskum sið. Núverandi kirkja var byggð 1884 en var stórlega endurbætt árið 1980. Yfirsmiður við upphaflegu bygginguna var Sigurður Sigurðsson, faðir Stefáns skálds frá Hvítadal. Meðal góðra gripa kirkjunnar er forn altaristafla á austurgaflinum sem sýnir síðustu kvöldmáltíðina.

Ferðaþjónusta er aðaltekjulind staðarins og felur hún í sér rekstur á gistihúsi, veitingasölu og bensínafgreiðslu. Húsið sem staðsett er uppi á hæðinni ofan við Staðarskála var byggt árið 1913 og kallast það í daglegu tali Gamla húsið. Þar bjuggu ábúendur á Stað allt fram til ársins 1965 þegar nýtt íbúðarhús var byggt beint á móti Staðarskála. Í dag búa eigendur og rekstraraðilar Staðarskála einnig á Smáragili og Staðarflöt.
 
Á Stað var fastur skiptistaður landpóstanna frá Vestur-, Norður- og Suðurlandi allt frá árinu 1885 til ársins 1930 en þá varð fært fyrir bílaumferð milli landshluta. Á sama tímabili var Staður póstafgreiðsla fyrir stóran hluta landsins og gististaður fyrir ferðafólk sem fylgdi landpóstunum á ferð sinni. Norðan við Staðarskála var reist minnismerki um landpóstana árið 1993. 
 
Bensínsala var sett upp árið 1929 á melnum neðan við Stað og 1960 hófu ábúendur á Stað þeir bræður Magnús og Eiríkur Gíslasynir ásamt eiginkonu Magnúsar, Báru Guðmundsdóttur, veitingasölu í Staðarskála. Með vaxandi umferð um þjóðveginn hefur rekstrarumfang Staðarskála aukist jafnt og þétt. Þar er boðið upp á hamborgara, samlokur, kjúkling og ýmsa aðra grillrétti auk þess sem réttur dagsins er í boði í hádeginu og kvöldmatnum. Frá árinu 1990 hefur upplýsingamiðstöð fyrir ferðamenn verið starfrækt þar yfir sumartímann í samstarfi við Ferðamálafélag Vestur-Húnavatnssýslu. Síðan 1998 hefur Íslandspóstur rekið útibú innan veggja Staðarskála og þjónar það Hrútafirði og Bitrunni.  

Þegar byggt var við Staðarskála árið 1971 voru útbúin 4 tveggja manna herbergi á neðri hæð byggingarinnar og var þar rekin gisting um árabil en herbergin gegna nú öðrum hlutverkum. Sumarhús sem rúmar 6 manns í gistingu var keyptur árið 1988 og leigður út í nokkur ár en nú er búið í því allt árið um kring. Nýtt gistihús með 18 tveggja manna herbergjum og veitingaaðstöðu fyrir um 80 manns var opnað árið 1994 og árið 2005 bættust 8 tveggja manna herbergi með tilkomu húss sem keypt var tilbúið frá SG-húsum.