Landsímastöðin Brú

Árið 1950 ákvað Póstur og sími að færa símstöðina frá Borðeyri að Brú. Póstur og sími keypti væna spildu úr landi Mela undir starfsemina og byggði nýtt símstöðvarhús á Brú með heilli íbúðarhæð ofan á stöðvarhúsinu og stendur húsið á bakka Hrútafjarðarár rétt við brúna og vegamótin þar sem hringvegurinn og Strandavegur greinast. Einnig var reist raforkuvirkjun í Ormsá sem sér stöðinni fyrir rafmagni.

---

Símstöðin í Brú tók til starfa árið 1951. Um áratugaskeið var hún umdæmisstöð fyrir Vestfirði og skiptiborð talsímaþjónustu milli Norðurlands og Suðurlands. Þá var þar radíóstöð er gegndi þýðingarmiklu hlutverki og pósthús fyrir sveitina í kring. Allmargt fólk bjó í húsinu á þessum tíma, enda var starfsemin öflug og þjónustan mikilvæg. Með aukinni sjálfvirkni í fjarskiptamálum á síðari árum fækkaði fólki í Brú mjög og stöðin missti hlutverk sem umdæmis- og radíóstöð.

 

 

 

---

Árið 1954 reisti Kaupfélag Hrútfirðinga lítinn söluskála við hringveginn í námunda við símstöðina. Hann hefur nú verið stækkaður mikið og er rekinn undir nafninu Veitingarskálinn Brú. Eftir að póstþjónustan færðist frá Símstöðinni í Brú að Stað í Hrútafirði hefur gamla símstöðvarhúsið fengið nýtt hlutverk. Vorið 2000 var lokið við að koma upp glæsilegri gistiaðstöðu í símstöðinni og setja upp upplýsingamiðstöð ferðamála á jarðhæð hússins. Árið 2002 eignaðist Staðarskáli ehf. Símstöðin í Brú og Veitingaskálinn Brú.